Naš šulski program
Zhromadnje tworić
Smy přećelni mjez sobu a wažimy sej jedyn druheho.
Akceptujemy kóždeho ze swojimi sylnosćemi a słabosćemi. Dźiwamy
na indiwiduelne wuknjenske potrěbnosće.
Zhromadnje smy zamołwići za wuhotowanje šulskeho doma a
organizaciju wšědneho dnja na šuli (šulerske dohlady, přestawka w
pohibje).
2plus – Dwě rěči a hišće wjace
Serbšćina nas přewodźa wšědny dźeń. Mnohe rěčne wobroty su
samozrozumliwje serbske.
Naše šulerki a naši šulerjo pohłubša a rozšěrjeja swoje rěčne
kmanosće we wučbje serbšćiny. Tuta so po rěčnym niwowje w
skupinkach podawa.
Maćernorěčne dźěći wukubłuja so paralelnje k předmjetej němčina
wobšěrnje w serbskej rěči a kulturje.
Na projektnych dnjach zaběramy so mjez druhim z nałožkami a
serbskej kulturu.
Někotre wěcne předmjety podawaja so dwurěčnje němsce a serbsce.
Dźiwamy při tym na wšelake rěčne wuměnjenja. Maćernorěčne dźěci
so při tym wosebje w swojej rěči spěchuja. Prioritu maja
fachowowěcne wobsahi.
Jako druhu cuzu rěč poskićamy rušćinu.
Wubrane wučbne wobsahi tež wěcnych předmjetow sposrědkuja so
wjacerěčnje (rusce, jendźelsce).
Šulerjo a šulerki wobdźěla so na rěčnych wubědźowanjach. To jich
motiwuje a dowjedźe k lěpšim wukonam.
Wuknjenje za žiwjenje
Předmjety zwjazowaca wučba a předmjety zwjazowace projekty
podpěraja zrozumjenje wuknjenskich wobsahow a spěchuja wuwiće
kompetencow – štož je wjace hač ryzy fachowa wěda.
Wuknjenje w šuli a zwonka jeje
Na pućowanskich a projektnych dnjach zeznawaja šulerki a šulerjo
swoju blišu wokolinu a wutworjeja wědomje za naslědne wuwiće.
Rozestajamy so kritisce ze stawiznami a přitomnosću našeho regiona
a wopytujemy prawidłownje wopomnišći Budyšin II a Pirna[1]Sonnenstein.
W někotrych rumnosćach mamy digitalne tafle. Nimo toho steja
wuknjacym ipady k dispoziciji.
Podpěramy samostatne domjace wuknjenje tež přez našu
wuknjensku platformu moodle.
Wažne je nam sposrědkowanje wuknjenskich strategijow.
Starši jako partnerojo
Poskićamy prawidłownje staršiske wječorki kaž tež rozmołwy a
poradźowanja k wubratym ćežišćam.
A po wučbje?
Mamy šěroki cyłodnjowski poskitk, kiž wobkedźbuje zajimy na polu
sporta, wuměłstwa, techniki a hospodarstwa.
Šulske socialne dźěło
Šulerkam a šulerjam kaž tež wučerskemu personalej poboku steji
šulskosocialna dźěłaćerka. Wona pomha při indiwiduelnych
problemach.
Wuknjenje za přichod
Přihotowanje na powołanske žiwjenje je wobstatk wučby.
Zawodowe praktika a projekty ÜAZ podpěraja šulerjow a šulerki při
orientaciji.
Wuknjacy zeznawaja w běhu šulskeho časa wjacore předewzaća
regiona. Wosebje wažne su nam dwurěčne institucije města Budyšin.
Nas podpěraja:
Rěčny centrum Witaj
Serbski muzej
Měšćanski muzej Budyšin
Serbska kulturna informacija
Němsko-Serbske ludowe dźiwadło
Powołanske poradźowanje agentury za dźěło
Nadzawodowy wukubłanski centrum (ÜAZ)
ADAC
Policija
Hamtske sudnistwo Budyšin
Přirodoškitnej centrumje we Wjazońcy a Njeswačidle
Unesco-Biosferowy rezerwat Hornjołužiska hola a hatna krajina
Wopomnišćo Budyšin II
Wopomnišćo Pirna-Sonnenstein
Hygienowy muzej w Drježdźanac
a dalše